ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានណែនាំឲ្យក្រសួងផែនការពិភាក្សាជាមួយក្រសួងសេដ្ឋកិច្ចនិងហិរញ្ញវត្ថុ និងក្រសួងពាក់ព័ន្ធ ដើម្បីប្រែក្លាយសាលាជាតិផែនការនិងស្ថិតិ ទៅជាគ្រឹះស្ថានសាធារណរដ្ឋបាលដើម្បីពង្រឹងនិងពង្រីកវិសាលភាពតួនាទី និងភារកិច្ចឱ្យកាន់តែរីកចម្រើន និងមានប្រសិទ្ធភាពក្នុងបណ្ដុះបណ្ដាលវគ្គវិក្រឹតការ និងសុក្រឹតការដល់មន្ត្រីរាជការ និងមន្ត្រីបន្តវេនជាអ្នកគ្រប់គ្រង និងជាអ្នកដឹកនាំ។
ក្នុងពិធីបិទសន្និបាតបូកសរុបការងារឆ្នាំ២០២៣ និងលើកទិសដៅបន្តឆ្នាំ២០២៤ របស់ក្រសួងផែនការ នាថ្ងៃទី៩ ខែមេសា ឆ្នាំ២០២៤ សម្ដេធិបតីបញ្ជាក់ថា «ទាក់ទងនឹងសាលាជាតិផែនការនិងស្ថិត ខ្ញុំសូមឲ្យក្រសួងផែនការពិភាក្សាជាមួយក្រសួងសេដ្ឋកិច្ចនិងហិរញ្ញវត្ថុ និងក្រសួងពាក់ព័ន្ធ ដើម្បីប្រែក្លាយសាលាជាតិផែនការនិងស្ថិតិ ទៅជាគ្រឹះស្ថានសាធារណរដ្ឋបាលដើម្បីពង្រឹងនិងពង្រីកវិសាលភាពតួនាទី និងភារកិច្ចឱ្យកាន់តែរីកចម្រើន និងមានប្រសិទ្ធភាពក្នុងបណ្ដុះបណ្ដាលវគ្គវិក្រឹតការ និងសុក្រឹតការដល់មន្ត្រីរាជការ និងមន្ត្រីបន្តវេនជាអ្នកគ្រប់គ្រង និងជាអ្នកដឹកនាំ»។
សម្ដេចធិបតីមានប្រសាសន៍ថា ដើម្បីទ្រទ្រង់ការងារអប់រំបណ្ដុះបណ្ដាលប្រកបដោយគុណភាព និងសមត្ថភាព សាលាជាតិផែនការនិងស្ថិតិត្រូវលើកកម្ពស់សមត្ថភាពរបស់ខ្លួន ទាំងសមត្ថភាពគ្រូ និងសមត្ថភាពស្ថាប័ន ដើម្បីជាមូលដ្ឋានគ្រឹះអប់រំ និងបណ្ដុះបណ្ដាល។
សម្តេចធិបតី គូសបញ្ជាក់ថា សាលាជាតិផែនការនិងស្ថិតិ គឺជាមជ្ឈមណ្ឌលបណ្ដុះបណ្តាលធនធានមនុស្សមួយដ៏មានសារសំខាន់លើវិស័យផែនការ, ស្ថិតិ និងប្រជាសាស្ត្រ ដែលស្របនឹងគោលនយោបាយរបស់រាជរដ្ឋាភិបាលក្នុងការអភិវឌ្ឍមូលធនមនុស្ស៕
ប្រភព៖ https://www.hotnews-asia.com/detail/296938